الخميس, سبتمبر 23, 2010
Almowhed
سكـــــــــــــــــــــون
ياه كلمه جميله اوى
وبتحمل معانى ممتعه
والاجمل من كده اننا كلنا بنحتاج السكون
بنحتاج ميكنش فى صوت ولا حتى الهمس الموجود
بنحتاج سكــــــــــــون
-------------------
حسيت بده اول ما دخلت البيت
حسيت انى كنت مختفى لايام وسنين
حسيت ان جوايا حنان للمكان
حسيت انى زى الطفل لمابيكون فرحان لما يلعب مع مامته
وزى الانسان اللى بيحب ونفسه يشوف حببته
--------------------
وزى السمكه لما تخرج من المايه نفسها ترجع تنط تانى فيها
وبرضو زى السكر لما بيدوب فى الشاى وبينسجم مع حباته
وزى العصفور لما بيكون لسه صغير وعاوز يطير ويفضل يقع وفى الاخر يطير
وزى القلم لما بكتب بحبره على الورق من غير ما يجرحه
وزى الانسان لما بيحتاج يشرب وهو هيموت من العطش
حسيت انى محتاج لسكون
--------------------
سكون بس مش اى سكون
سكون خالى من الشوائب
سكون مفهوش متاعب
سكون جى فى وقت مناسب
واتمنى يكون فعلا مناسب
يـــــــــاه على السكون
-------------------
ياه لما تنام على السرير وانت تعبان ومحتاج لراحه
ياه لما بتبقى طالع عينك فى شغل وفى الاخر بتشوف نيتجه اللى بتعمله
ياه لما بتذاكر علشان تنجح وتجيب مجموع اللى نفسك فيه
ياه لما بتبقى بتفكر فى شئ ونفسك يحصل وفى الاخر يحصل
ياه على حاجات كتير اوى
بتخليك مرتاح
علشان كده بقول محتاج سكون
---------------------
لان السكون متعه غير مرأيه
عامله زى النسمه لما تعدى عليك وانت فرحان
او زى موجة البحر الهاديه الى بتعمل احسن لحن ممكن تسمعه
وممكن تكون زى صوت العصفير لما بتصوصو وانت ماشى جمب اى شجره
او زى شروق الشمس بضوئها الدافى اللى بتجرى علشان تاخده بالاحضان
كل ده بيخلنى اقول حان وقت السكون
--------------------
لان كل انسان بيحاج الوقت ده
بيكون هدوء مع نفسه
بيحاج سكون فى عشته
بحتاج يخرج الانسان اللى جواه علشان يحس به
علشان كده محتاج سكون
بس
-----------------------
بالرغم انى نفسى انام اوى بس قلت لازم اقول تخريفه كده على الماشى
يارب تعجبكم وتحسوا بالسكون
ســـــــــــــــكون
Posted in: خواطر
0 التعليقات:
إرسال تعليق
اتمنى كتابت تعليق
يعبر عن شخصية القارئ